Tsohon Mataimakin Shugaban Ƙasar Najeriya, Atiku Abubakar, ya buƙaci Shugaba Bola Ahmed Tinubu ya yi wa ’yan Najeriya bayani kan sauya hanyar wasu sassan babbar hanyar Lagos–Calabar Coastal Highway da kuma rahotannin shirin karɓar sabon bashin dala biliyan 20.
Atiku ya ce sauya hanyar aikin ya haifar da tambayoyi kan yadda aka tsara kwangilar tun farko, kuɗin da aka riga aka biya da kuma yadda za a ƙididdige sabon kuɗin aikin.
Ya kuma buƙaci gwamnatin tarayya ta bayyana ko da gaske tana shirin neman wannan bashi, da irin ayyukan da za a yi amfani da kuɗin wajen gudanarwa.
Tsohon mataimakin shugaban ƙasar ya kuma yi kira ga Ma’aikatar Ayyuka ta Tarayya da ta bayyana tsohon tsarin hanyar da sabon tsarin da aka yi, tare da bayanan kuɗin kwangilar da aka biya zuwa yanzu.
Sai dai zargin shirin karɓar sabon bashin dala biliyan 20 da Atiku ya yi na buƙatar ƙarin bayani daga gwamnatin tarayya domin tabbatar da sahihancinsa.
Rahotannin sun bayyana ne a ranar 12 ga Oktoba, 2026, yayin da ake ci gaba da muhawara kan sauye-sauyen da aka yi wa aikin hanyar da kuma yadda za a samar da kuɗin gudanar da shi.
About The Author
