Gwamnatin Jihar Katsina ta ce ta fitar da Naira biliyan 8.5 a matsayin kuɗin gudummawar jihar domin faɗaɗa shirin Nigeria for Women Programme Scale-Up, wanda ake sa ran zai amfani mata kusan 800,000 a faɗin ƙananan hukumomi 34 na jihar.
Babban Masanin Ci Gaban Al’umma kuma jagoran shirin daga Bankin Duniya, Michael Ilesanmi, ne ya bayyana hakan yayin ganawa da manema labarai a Katsina.
Ilesanmi ya ce kuɗin Naira biliyan 8.5 ba wai kawai an sanya shi ne a cikin kasafin kuɗi ba, illa dai gwamnati ta riga ta fitar da kuɗin a cikin shekaru biyu da suka gabata a matsayin gudummawar da jihar ke bayarwa ga shirin.
Ya kuma bayyana cewa Bankin Duniya zai ƙara samar da dala miliyan 15 domin tallafa wa aiwatar da shirin a jihar Katsina.
A cewarsa, shirin zai haɗa mata masu ƙaramin ƙarfi da masu rauni cikin ƙungiyoyin mata, tare da basu damar samun ilimin harkokin kuɗi, damar samun jari, kasuwanni, dabarun gudanar da sana’o’i da sauran hanyoyin inganta rayuwarsu.
Shirin wanda aka fara da ƙananan hukumomi shida, yanzu an faɗaɗa shi zuwa dukkan ƙananan hukumomi 34 na jihar Katsina. Hakan ya sa adadin matan da ake sa ran za su amfana ya ƙaru daga kimanin 150,000 zuwa akalla 800,000.
Haka kuma, an bayyana cewa matan za su kasance cikin ƙungiyoyin da ake kira Women Affinity Groups, inda za su samu horo kan tara kuɗi, ilimin harkokin kuɗi da yadda za su bunƙasa sana’o’insu.
Kwamishiniyar Harkokin Mata ta Jihar Katsina, Hajiya Aisha Aminu-Malumfashi, ta ce za a fara rabon Community Investment Fund a ranar 4 ga Oktoba.
Ta ce matan da ke cikin shirin za su kasance cikin ƙungiyoyi masu mambobi 25, inda za su yi tanadi tare tare da gudanar da ayyukan da za su taimaka wajen samar musu da kuɗin shiga.
Rahotanni sun nuna cewa shirin ba wai bayar da kuɗi kawai ya ƙunsa ba, domin ana kuma son taimaka wa mata wajen samun kasuwa, dabarun sana’a da kuma wasu hanyoyin da za su ƙara musu ƙarfin tattalin arziki.
A wani rahoto, an kuma bayyana cewa gwamnatin jihar na shirin haɗa waɗanda za su amfana da shirin inshorar lafiya domin ƙara faɗaɗa tallafin da za su samu.
Abin lura
Wannan sabon mataki ya zo ne yayin da gwamnatin Katsina ke ƙoƙarin faɗaɗa shirin daga wuraren da aka fara gwaji zuwa dukkan ƙananan hukumomi 34.
A watan Yulin 2026, gwamnatin jihar ta bayyana cewa mata sama da 57,000 a Katsina, Daura da Funtua sun tara sama da Naira miliyan 349 a cikin tsarin ƙungiyoyin mata na shirin.
Yanzu, gwamnatin jihar da Bankin Duniya na sa ran faɗaɗa shirin domin ya kai ga mata kusan 800,000.
About The Author
