Jami’an rundunar ’yan sandan jihar Katsina, tare da haɗin gwiwar jami’an tsaron sa-kai, sun ceto mutane uku da aka yi garkuwa da su, tare da kwato shanu 12 da aka sace a wasu hare-hare daban-daban a ƙananan hukumomin Kankia da Musawa.
Rundunar ’yan sandan jihar ce ta bayyana hakan a cikin wata sanarwa da kakakinta, DSP Abubakar Sadiq, ya fitar.
A cewar sanarwar, lamarin farko ya faru ne da misalin ƙarfe 9:30 na daren ranar Talata, 6 ga Oktoba, lokacin da wasu da ake zargin ’yan bindiga ne suka kai hari ƙauyen Fakuwa da ke ƙaramar hukumar Kankia, inda suka yi garkuwa da mutane uku tare da satar shanu 12.
Bayan samun rahoton harin, jami’an ’yan sanda na Kankia sun haɗa kai da jami’an tsaron sa-kai, suka bi sawun waɗanda ake zargin tare da tare su.
Rundunar ta ce bayan artabun da aka yi, waɗanda ake zargin sun tsere zuwa daji, suka bar mutanen da suka yi garkuwa da su da kuma shanun.
Sanarwar ta tabbatar da cewa an ceto mutanen ukun cikin ƙoshin lafiya, sannan aka mayar da su ga iyalansu tare da kwato dabbobin da aka sace.
A wani harin daban, rundunar ta ce wasu da ake zargin ’yan bindiga ne sun tare hanyar Kiryoyi zuwa Dangani da ke ƙaramar hukumar Musawa da misalin ƙarfe 1:30 na safiyar Laraba, 7 ga Oktoba.
Jami’an tsaro sun garzaya wurin bayan samun kiran gaggawa, lamarin da ya tilasta wa waɗanda ake zargin tserewa. Daga baya, jami’an tsaro sun gano gawar wani da ake zargin ɗan bindiga ne a yankin.
Rundunar ’yan sandan ta ce ana ci gaba da ƙoƙarin gano tare da kama waɗanda suka tsere.
Kwamishinan ’yan sandan jihar, CP Ali Umar Fage, ya yaba da ƙoƙarin jami’an tsaro, tare da kira ga jama’a da su riƙa bayar da sahihan bayanai cikin gaggawa domin taimakawa wajen yaƙi da rashin tsaro.
Duk da wannan nasara, lamarin ya sake jaddada muhimmancin ci gaba da ƙoƙarin kare al’ummomin da ke fuskantar barazanar hare-haren ’yan bindiga a jihar Katsina.
About The Author
