Yanayin siyasa a jihar Katsina na ci gaba da jan hankalin jama’a, bayan wasu manyan jami’an siyasar Gwamnatin Jihar sun yi murabus daga mukamansu cikin ‘yan kwanaki.
Akalla jami’an siyasa biyar ne suka bar mukamansu a gwamnatin Gwamna Dikko Umar Radda, lamarin da ya haifar da ce-ce-ku-ce a daidai lokacin da ake kara samun motsin siyasa gabanin babban zaben 2027.
Daga cikin wadanda suka yi murabus akwai tsohon Kwamandan Janar na Hukumar Hisbah ta jihar, Dr Aminu Usman, wanda aka fi sani da Abu Ammar, da mataimakinsa mai kula da ayyuka, Muhammad Shitu Maslaha.
Haka kuma, tsohon shugaban Hukumar Jin Dadin Alhazai ta jihar Katsina, Alhaji Kabir Bature Sarkin Alhazai, ya ajiye mukaminsa bayan ya yi aiki tun bayan nada shi a shekarar 2023.
Sauran wadanda suka yi murabus sun hada da Fadila Sani Dalhatu, tsohuwar Babbar Mai Ba Gwamna Shawara ta Musamman kan Aiwatar da Ayyuka da Bibiyar su, da kuma Abubakar Soja Tsanni, wanda ya kasance mai ba Gwamna shawara kan harkokin matasa.
Rahotanni sun ce murabus din ya zo ne a lokacin da ake zargin akwai sabanin ra’ayi tsakanin wasu bangarorin jam’iyyar APC a Katsina, musamman dangane da siyasar da ke gabatowa ta shekarar 2027.
Sai dai har yanzu babu wani daga cikin jami’an da suka yi murabus da ya bayyana a hukumance cewa sun bar mukamansu ne saboda rikici da Gwamna Radda, sannan gwamnatin jihar ma ba ta tabbatar da cewa murabus din na da alaka da wani rikicin cikin gida ba.
Wasu majiyoyi a cikin jam’iyyar APC sun yi ikirarin cewa wasu daga cikin wadanda suka yi murabus sun fara kusantar bangaren Ibrahim Kabir Masari, mai ba Shugaban Kasa Bola Tinubu shawara kan harkokin siyasa.
Sai dai wannan ikirari bai samu tabbaci mai zaman kansa ba, kuma masu ruwa da tsaki da ake alakanta su da lamarin ba su fito fili sun tabbatar da cewa akwai wata sabuwar kawance ko rikici tsakanin bangarorin ba.
A wani bangaren kuma, Gwamna Dikko Radda ya yi sabbin nade-nade guda bakwai, ciki har da nada Sheikh Nasiru Funtua a matsayin sabon shugaban Hukumar Jin Dadin Alhazai ta jihar Katsina.
Haka kuma an nada Muhammad Musa a matsayin Kwamandan Janar na Hukumar Hisbah ta jihar, tare da wasu sabbin masu ba gwamna shawara da jami’an hukumomin gwamnati.
Masana siyasa sun bayyana cewa muhimmancin murabus din zai fi bayyana ne idan aka ga irin matakin da wadanda suka bar gwamnati za su dauka nan gaba, musamman ko za su ci gaba da kasancewa cikin bangaren siyasar Gwamna Radda ko kuma su koma wani bangare.
Yayin da zaben 2027 ke kara matsowa, idan aka samu karin sauye-sauye a cikin gwamnatin jihar, hakan na iya kara sanya siyasar Katsina cikin yanayin da jama’a za su rika sa ido sosai a kai.
A halin yanzu, babban abin da ke jan hankali shi ne ko murabus din jami’an nan zai tsaya a nan, ko kuma zai zama farkon wasu karin sauye-sauyen siyasa a Katsina.
About The Author
