Wani wanda ya tsira daga mummunan lamarin hakar ma’adinai ba bisa ka’ida ba a Jihar Neja ya yi zargin cewa wasu jami’an hukumar tsaro ta NSCDC sun fesa wani sinadari da ba a san ko menene ba a cikin dakin da ake tsare da masu hakar ma’adinin.
Wanda ya tsira daga lamarin ya bayyana hakan ne yayin ziyarar da Ministan Harkokin Cikin Gida, Olubunmi Tunji-Ojo, ya kai wa wasu daga cikin wadanda suka tsira, wadanda a yanzu suke hannun Hukumar Tsaro ta Farin Kaya (DSS).
An dauki hoton bidiyon ziyarar ne aka kuma wallafa shi a shafin @NigAffairs na dandalin X.
A cewar wanda ya tsira din, an saka ma’aikatan hakar ma’adinan a cikin kurkukun ne kafin a fesa musu sinadarin.
“Sun saka mu a wani ƙaramin ɗaki. Mu 17 ne, kuma a can suka ajiye mu. Daga baya suka kawo wasu mutane takwas. Mun gaya musu cewa ɗakin ya yi ƙanƙanta sosai kuma bai isa gare mu ba, amma suka ce mu tashi tsaye, sai muka tashi.
“Daga baya suka kai mu kurkuku. Wurin yana da zafi sosai, suka kuma rufe mu a ciki. Sai suka fara fesa wani abu. Bayan haka, wasu mutane suka fara faɗuwa ƙasa.
“Wasu daga cikinmu suna cikin hayyacinsu, amma suka ce mu ci gaba da zama a wurin. Mun gaya musu cewa mutane na mutuwa, amma ba su saurare mu ba.
“Ban san ko menene wannan sinadarin ba, amma bayan sun fesa shi, mutane suka fara faɗuwa. Abin da ya faru da mu ke nan,” in ji wanda ya tsira daga lamarin.
Ya kuma yi ikirarin cewa lamarin ya faru ne bayan an kama ma’aikatan hakar ma’adinan kuma an tafi da su wurin tsarewa.
Ministan ya ziyarci waɗanda suka tsira a matsayin wani ɓangare na ƙoƙarin fahimtar abin da ya faru yayin wannan mummunan lamari na hakar ma’adinai, da kuma jin bayani kai tsaye daga bakin waɗanda suka tsira.
About The Author
